Friends pay tribute to fall victim.

 

http://www.wort.lu/wort/web/en/community/articles/2011/08/158811/index.php

 

Austurferð

Erum að skreppa í "Gamlann" með helgargesti. Verðum síðan fram í vikuna....gamlingjarnir

K.v.Gunna syss.

Flækingar á ferð

Við fórum í frábæra skoðunarferð um Snæfellsnesið um síðustu helgi. Við þræddum nánast alla afleggjara og skoðuðum það helsta í handbókinni. Náttúra Snæfellsnessins er stórbrotin og virkilega gaman að skoða það í fylgd þessara tveggja áhugasömu og jákvæðu heiðursmanna.

Ekki spillti nú fyrir að hitta á götugrill á Dönskum dögum í Stykkishólmi þar sem Jónas grillaði ofaní okkur og hljómsveit Sundabakka hélt uppi stuðinu á föstudagskvöldinu. Við gistum svo hjá Ingu systur og Jónasi, Inga sló í gegn hjá strákunum með því að gefa þeim skúffuköku og mjólk fyrir svefninn .

Eftir þvælinginn um Nesið á laugardeginum enduðum við í Litlu-Brekku og dvöldum þar í góðu yfirlæti. Eftir dásamlegan nætursvefn, morgunkaffi og spjall, vísiteruðum við í Ánabrekku og Kvíaholti - gaman að hitta allt þetta dásamlega fólk.

Síðan var keyrt heim á sunnudaginn, spiluðum "Spurt að leikslokum" á heimleið, þannig að tíminn leið  hratt. Við þurftum að ná í Sigga til Akureyrar á heimleiðinni, svo að síðasta stoppistöð fyrir Dalvík var í Kjalarsíðunni hjá Sindra, Katrínu og litla Ólafi Atla, en þau eru búin að koma sér vel fyrir þar. 

Dagur og Hjörvar Óli, takk fyrir stórskemmtilega helgi!

Hér eru myndir úr ferðinni!  http://www.flickr.com/photos/gudnysigga/sets/72157627440173408/  

Nú er að pakka niður fyrir skiptinemann minn, en hann flýgur á vit nýrra ævintýra í Sviss á fimmtudagskvöldið!

Kveðja, Guðný. 

Smá hugleiðing á afmælisdegi Beggu syss.

Þegar húmar að kveldi

og litróf himinsins

minnir á gimstein

sakna ég þín mest...

af öllu.

 

 

 

Da, ra, ra, dirilídirí

Mikið unaðslega er búið að vera gaman í Gamlanum. Ákváðum að "beila" á Bræðsluna þetta árið og leyfa tengdó að njóta félagsskapar okkar á frönskum dögum í staðinn .

Yngri deildin réði ríkjum í óðalinu og auðvitað varð þetta besta Bræðsla ever og rólegheitin í Gamla með eindæmum að sögn. Allavega var aðkoman á sunnudagskvöldið afar ljúf og allir í góðum gír.

Ég skellti mér í hörku púl, fimm daga göngu með Ferðafélagi Fljótsdalshéraðs og Árna Áskels, flottur 12 manna gönguhópur. Gengum í Stapavík, Stórurð, frá Borgarfirði yfir Brúnavíkurskarð og síðan áfram Súluskarð til Breiðuvíkur, frá Breiðuvíkurskála upp á Glettingskoll(!) og niður í fjöru í Kjólsvík og síðan aftur í skála. Á föstudaginn gengum við svo yfir Gagnheiðina og heim til Borgarfjarðar. Setti persónuleg met í hverju spori síðustu dagana !  Siggi minn var voða stilltur í Gamla á meðan ég fékk útrás, Norðurlandsdeild Jörfaliðsins hélt honum félagsskap á meðan.

Við tók unaðslegur Álfaborgarséns; Lindarbakkadagur þar sem sveitarstjórnarmenn bökuðu pönnukökur ofaní gesti og gangandi, nokkrir álfar sýndu álfatískuna í Álfaborginni og um 70 manns fóru í ævintýraferð á heyvögnum. Lítið fór fyrir auglýstum markaði, en Pöbbarútan sló í gegn og vorum við Magga mjög duglegar að notfæra okkur hana. Árni Áskels og Hjörvar Óli héldu músíkinni lifandi í Álfheimum og Fjarðarborg en Palli Sig og Þröstur Bóa og Binnu í Álfakaffi og maður, hvað við sungum!

Nonni Arngríms og félagar héldu svo uppi stuðinu í Fjarðarborg fram eftir nóttu og maður, hvað við dönsuðum!

En allt tekur þetta nú enda. "Kláruðum" í Gamlanum í gær, strauk yfir gólf og raðaði púðum, Helga Björg kíkti yfir lækinn í gær og fór klyfjuð af opnuðum fernum og salat- og sósudósum. Heilmikill lager er í Gamlanum af klósettpappír og kaffifilter, en það skemmist ekki. Uppþvottalögur og ljósaperur eru hinsvegar af skornum skammti, að öðru leyti bíður Gamlinn okkar glansandi fínn eftir næstu gestum. 

Nú er að koma sér upp úr ferðatöskum og finna Fiskidagsgírinn, mikil törn framundan. Á ekki að mæta?

Guðný Sigga.  

Ps. Set inn myndir þegar tími gefst til...

Stefán Huginn

Sælt veri fólkið.

Ásgeir Rúnar og Helena eignuðust dreng á fimmtudaginn.

Hann fékk nafnið Stefán Huginn, í dag. Þá var hann skírður og er kominn heim. Hann tók öllu vel, komunni í heiminn sem og nafninu.

Það  lítur út fyrir að þetta verði mesti prýðispiltur!
 

Kær kveðja, Fjóla - sem er að reyna venjast því að vera amma ,,Gústa og Stebba"

Rigning á Borgarfirði.

Við Akraselir komum í Jörfa um kl. 5 aðfaranótt fimmtudags eftir akstur úr bænum. Morgununn var yndislegur og fallegur og lofaði góðu fyrir dvöl okkar. En seinnipartinn fór að þykkna upp og síðan hefur verið þungbúið og rigning, kalt og hryssingslegt. En við látum það ekki á okkur fá. Kjötsúpa er í pottinum og Sóló suðar. Það er lífið.

Óli Gústa að flytja til Mexíkó???

http://www.freisting.is/v.asp?page=591&Article_ID=5484

Ergo: Aldrei að skilja Facebook opið þegar maður bregður sér af bæ.

Stelpuferð í Gamlann 14.-16. júní

Þegar heimþráin bar mig ofurliði á dögunum og kallarnir mínir ekkert á leiðinni neitt, fékk ég lánaða eina dúllu og skrapp austur.

Þótt ferðin okkar Láru hafi verið stutt, var ótrúlega margt sem við gátum komið í verk. Eins og þið sjáið á myndunum þá fórum við út í Höfn, bæði í Gerðisfjöru og Merkisfjöru, kíktum í heimsókn í Álfheima, Borg, Sætún og Hafblik, fórum í Álfakaffi, kirkjugarðinn, Álfaborg, kirkjuna...og þetta er ekki allt. Við náðum líka dásemdarstundum í Gamlanum við spil og lestur, horfðum á DVD og nutum okkur niður í tær. Svo þurfti auðvitað að plokka ormana innan úr bobbunum þegar búið var að hella sjóðandi vatni yfir þá. Lára fann vinkonu síðasta daginn, eða vinkonan fann hana , dóttir ráðskonunnar á Borg var einmitt að leita sér að leikfélaga!   Veðrið var í góðu lagi, þoka niður fyrir miðjar hlíðar en þokkalega þurrt og logn.

Elsku Lára Hlín, takk fyrir dýrðardaga, við þurfum að endurtaka þetta einhverntíma. Þetta var frábært og alveg ný reynsla fyrir mig að fara svona stelpuferð!  Lilja og Svavar, takk fyrir  lánið! 

Fullt af myndum í albúmi!

"Örferð" í Gamlann :)

Ég, ásamt Ragga mínum og barnabörnunum á Húsavík, fór þá allra stystu ferð á Borgarfjörð, sem ég hef áður farið,  um helgina   Við byrjuðum á því að tjalda fellihýsinu á Egilsstöðum og vorum komin í Gamla-Jörfa kl. 19.30 á föstudagskvöldið.  Þóra var búin að kveikja upp fyrir okkur og mætti okkur ylurinn frá Sóló - notalegt   Þá var slegið upp miklu pylsupartíi !  Að því loknu fórum við til Jóu í Brekkubæ og færðum henni afmælisgjöf (afmælið er reyndar í dag) og vorum við hjá henni um stund.  Barnabörnin léku við Sigurstein hans Vidda, sem tíndi til allt dótið sem til er í Brekkubæ, og hana Freknu, sem er mjög skemmtileg.  Þá var nú kominn tími til að drífa sig heim og fara að sofa.  Á laugardagsmorguninn drifum við í okkur morgunmat, Palli fann besta vin sinn, hann Kristján Daða, sem elskar að vera á Borgarfirði.  Léku þeir sér saman um stund.  Svo fór afi Raggi með allan hópinn (nema ömmu) út í Hafnarhólma, en hún var heima á meðan að "drífa sig" að pakka og skúra.  Að því loknu "drifu sig" allir í bílinn og fóru upp í Egilsstaði, en þar var mikið fótboltamót, sem Palli keppti með Völsungi.  Þeir stóðu sig með prýði.   Svoleiðis var "örferðin" í Gamlann   Kær kveðja, Amma Gauja, Afi Raggi, Palli, Lára og Hildur Gauja.

P.S.  Lára hefur áhyggjur af því að við gáfum okkur að sjálfsögðu ekki tíma til að skrifa í gestabókina, svo að nú veit enginn að hún kom tvisvar í röð (sko enginn á milli).  Nema að það væri hægt að semja við Steina að geyma eina síðu óskrifaða......